Pantun karo

Sere pia ni gele-geleken kuruah-ruah si regi-regi
Lagu kai gia siendeken, mejuah-juah si megi-megi
Erpudung batang jera si baba ku Berastagi
Enggo pulung kita bagenda, notokenca jumpa rejeki turang….

Enterem kuidah jelma turang, bagi perbunga ndapdap
Mejile tuhu rupana, payo nge sibar nitatap
Adi perukurenna rembang, kepe bagi kap-kap
Adi la mujiken bana, labo akapna terakap turang …..

Enterem kuidah jelma turang, bagi perbunga ndapdap
Mejile tuhu rupana, payo nge sibar nitatap
Adi mujiken bana, ngayak terang tahan ercakap
E piah kedungenna, uis merigat lanai terangkap turang ….

Litka kuidah jelma turang, bagi perjabu tengah
Kawes kemuhen rubat bage-bagem akapna megah
Adi lawes ia nagani-nagani api kekurumah
Piah keri penaganina, tarenna cekurak dingen ersumpah aron ….

Adi rubat ras senina em tandana la meteh ngena
Adi rubat kita ras turang em tandana pemeteh kurang
Adi rubat ras anak kuta em tandana jelma metuda
Adi rubat ras teman meriah, rahasia mudah teridah
Adi rubat ras anak jabu em tandana percemburu
Adi rubat ras nande bapa, kabilangen man Dibata turang …..