Tengah berngi Simbages

Sabtu, 09 April 2011

Pantun karo (PENAMPEN B )

Tabeh tabeh kaperas
Tande kupucuk kaciwer
Nabeh kata nibelas


Tapi terjeng tampuk biber

Kutare batang galiman
Tanggak talang si asar ndukur
Ise pe labo lit teman
Adi kita meganjang rukur


Kandi kandi buluh la riket
Batang buluh tabah man titi
La erngadi ngadi kena kuinget
Adi tunduh pe kena bas nipi

Batang kacihe i Tigalingga
Salagundi mbentar bulungna
Rupa mejile baban kutiga
Lagu mehuli me situna

(me bage ninta nakee....????)

Kubaba ranting tinaka
rulut-ulut nali rakutna
Adi terbaba ukur sisada
Ukur gulut tambah serbutna

Batang buluh mbelah itaka
Buluh belangke cinepen nggurisa
Arus terbeluh ncibalken kata
Cakap medate ntabeh megisa

(tapi awas gombal euy....!!!)
Gawah - gawah ku Jakarta
kubaba luah Si nangka Nguda
Enda ikut ateku sada
ibas lembaren Pantun Karo enda

Medan nari ku Tiga Lingga
Singgah aku i Kabanjahe
Lalap kel ndube aku tertima
ise nge pagi nina pusuhku si jadi permen nande

Enda ia tualah pirang
Ndabuhina kuta Perbesi
Aminna ndauh si kita sirang
Tapi kena tetapnge ateku jadi

Kerja Tahun nggo ndeher pudunna
tengah kesain kundul aku sisada
Adi nggo pagi tamat sekolahku enda
Ku legi kena Turang ku rumah mama

Enda sada makana dua
kenca dua makana telu
Ulanai Nde Tigan ukurndu dua
gelahna sahun pagi kita erdemu

Ku ndabuhken batu ku Taneh
Tanehna megara ndube rupana
Arah angin ku peseh ateku tedeh
Nandangi kena impal si ateku Ngena

Medan nari ku Jakarta
terus aku ku Jogjakarta
Ertoto kita man Tuhan Dibata
Gelahna ersada pagi pendungina arih - arihta
Kitik gia buah cikala..,,
Galang palu-paluna..,
Kentisik gia aku ngerana..,,
Mbelin Pasu-pasuNa....

------/////-------


Gundera salagundi...,,
Rimo manis baba ku Kandibata...,,
Mesera tuhu ibas pertibi...,,
Senang malem adi ras Dibata..,,

......./////........

Bulung-bulung kalinjuhang bibi..,,
Kerah-kerah bulung kelawes..,,
Ateku tutus atendu lahang agi..,,
Kujanari Ma Karo Lawes.........
......../////...............
SIBAREM - MEJUAH-JUAH....BRAVO KARO...

Dalan-dalan ku kuta Juhar
Juhar nari ku Jandi meriah
Enggo mbelang taneh kusiar
Latih kang e ah....... (adi gawah-gawah lalap dahin.. latih kin...) hehehe

Gantang-gantang i tengah kuta.....,,,,,
Kuakap tabu kepeken sudu...,,,,,
Kalak tandang si mbue gaya...,,,,,
Em erbanca aku nggo Nduru.....,,,,,,,,,,,

..................////////.........................
Lit sekinku kitik-kitik
kutek-tekken ku bulung bewan
dagingku enda si kitik-kitik
tapi aku kange pereman medan..... (hati-hati kena nake....)
----------//--------------------

Mentas si kuda gara...
dua kepe ranteina
mbelin si anak mama
man bangku si mejilena... (memang kin adi jelma ngayaki simejilena me kin...)
===================//===============

Kerja tahun i tiganderket......,,,,,,,
Melala kalak erbahan cimpa.....,,,,
Perban Nd.Ribu ukur nggo leket.....,,,,,
Lanai aku beluh ngerana....,,,,,

.................../////////////.......................

Bravo...TAKASIMA.........
Dalan-dalan ku pancur batu
Singgah kentisik nukur baju
Ateku ngena ndube man bandu
Erbahan aku enggo medungu

Melala nurung mas i tambak mbaru
Melala kertah i deleng sinabun
Si erteman ras Yesus Iblis pe la pang ngganggu
Tapi ola erminggu "sekali setahun"

Ikan nila i tambak Suka Makmur
Manggis tasak kulitna mbiring
Dibata nggit mereken pasu-pasuNa sampur
Adi lalah ketutusenta dekahen guling

Perpaler lau maler ku suah
Mesera kepeken terdo nangkeng-nangkeng
Si ernalem man Tuhan jumpasa tuah
Jumpa ate malem datsa ate keleng

Wortel ras Lobak i suan i juma
Perturahna mejile la kurang pupuk
Ngoge kata Dibata ola kita lupa
Gelah jumpa pe si jahat la kita subuk

Lobak mbentar wortel megersing
I baba ku tiga er keranjang-keranjang
Ertoto lebe maka erdahin em dahin si penting
Gelah pendahin sikap lalit si terbuang

Erdaya beras beras Arias
Entabeh nakanna adumna nurung
Encariken serpi tempa sakai pe labo bias
Saja inget ola lupa kubas wari Minggu pulung

I jandi meriah mejile lacina
Bage pe page gedang ruhina
Dibata mere eme simehulina
Kai nggo si ban adi kita enggo isampatiNa?

I suan bawang i juma Selandi
Perturahna sikap jumpa ate jadi
Erpengendes man Dibata la erngadi-ngadi
Pusuh si ceda enggo i tambari

Enda Gundera, Gundera Alas
Ku caleng sitik baba ku rumah
Adi lalah pengerananta medatas
Kerina kalak rate mekuah

Ku tabah buluh ku bahan belobo
I tengah juma kubahan inganna
Adi sekali-sekali ngenca si inget ertoto
Labo si gejap kekelengenNa banta

Kalak Karo la ngena atena penakit ACC
La kepe erngawan si buah tabu
Si nulak Yesus jadina bene
Si ernalem man Yesus ndatken pasu-pasu

Kai kurkurenndu e pedi
Bulung pe enggo bangkaren
Uga nge ukurndu e Agi
lalap la ertempasen

Kentang enggo ersuli
lalap la isuanken
Kertang dagingku e Agi
nginget arih la erkesehen

Udan bas ciger wari
lenggur sinenggeti
ulahndu si la mehuli
pusuhku rate mesui

Ate ngena banci sambari
bas seribu banci i pilihi
ateku ceda la tertambari
pala ersada kita mulihi

Gantang - gantang itengah kuta
Kuakap tabu kepeken sudu
Kalak tandang si mbue gaya
em ngerbahanca aku enggo nduru

Loh..loh..Joss..Joss..inikan lagu Nduru??? :blush: :blush:


Bola i tipak kabang kulebe
Si ayak-ayaken jelma ndatkenca
Adi ersada penggejapen keguluten pe bene
Baban si mbue pe la siakap mberatsa

Koor Moria tuhu sorana mejile
Tendengna cupingta la kita megelut
Adi nandangi teman kita mediate
Pusuhna senang bene ukur serbut

Adi keri ipen kesip me kurum
Ertuana jelma ijujungna me uban
Si nggeluh ras Yesus la kap iukum
Sabab dosana enggo ialemi Tuhan

Melala kembiri i kuta Buluh
Erngawan ngawan buluh i Sukarame
Adi bas pusuhta lit lalap gerupuh
Em tandana nggeluh langa jumpa dame

Pidato Soeharto tuhu berbobot
Isina eme kerna pembangunen
Megi kata Tuhan ola matanta ngenca melotot
Mulih kurumah lalit perubahen

Kerbo gunduk paksa ercebah
Melket dagingna erkubang-kubang
Tutuslah kita kerina ersembah
Ipasu-pasuNa geluhta la kai pe kurang
Bola i tipak kabang kulebe
Si ayak-ayaken jelma ndatkenca
Adi ersada penggejapen keguluten pe bene
Baban si mbue pe la siakap mberatsa

Koor Moria tuhu sorana mejile
Tendengna cupingta la kita megelut
Adi nandangi teman kita mediate
Pusuhna senang bene ukur serbut

Adi keri ipen kesip me kurum
Ertuana jelma ijujungna me uban
Si nggeluh ras Yesus la kap iukum
Sabab dosana enggo ialemi Tuhan

Melala kembiri i kuta Buluh
Erngawan ngawan buluh i Sukarame
Adi bas pusuhta lit lalap gerupuh
Em tandana nggeluh langa jumpa dame

Pidato Soeharto tuhu berbobot
Isina eme kerna pembangunen
Megi kata Tuhan ola matanta ngenca melotot
Mulih kurumah lalit perubahen

Kerbo gunduk paksa ercebah
Melket dagingna erkubang-kubang
Tutuslah kita kerina ersembah
Ipasu-pasuNa geluhta la kai pe kurang

Bulung-bulung kalinjuhang bibi,
kerah-kerah bulung kelawes,
ateku tutus atendu lahang agi,
kujanari ma karo lawes.







Tidak ada komentar: